Ms. Agnes L. Seide

BIOGRAPHIE AGNES SEIDE Manman mwen, Agnès SEIDE, fèt nan lane 4 novanm 1959 nan depatman Sud, vil Saint-Jean du Sud. Li te 5eme nan yon fanmi 5 frè ak sè, Jodi a, malerezman, rete sèlman tonton nou, Josède SEIDE, anpil moun konnen sou non tonton TIJO. Se nan lane 1980, manmim, anpil pwòch li yo rele Tati Loulouse, te deside tablil nan vil Okay, kote li bay nesans ak 2 pitit li yo : Mwen menm, Robenson Louis ak ti sè mwen Ronide Louis. Manmanm, se te yon fanm vanyan ki te gen anpil kouraj ak ladrès. Poul te leve epi edike nou, li te fè tout kalte sakrifis posib. Dòmi ta, leve bonè, ale vann nan mache poul te kapab bannou bonjan pen lenstriksyon. Menm nan zafè foutbòl, li te toujou la pou sipòtem, se te number one fan mwen. Se te yon moun ki trè sosyab, zanmim, zanmi Ronide, se te zanmil tou. Se konsa, apre tout kalte sakrifis li fè nan lavi li pou nou, move nouvèl la ta pral tonbe nan fen ane 2019 la, kote medsen yo an Ayiti, dekouvri premye sentom maladi kansè a nan tete li. Yon maladi li te sipòte ak anpil doulè epi kouraj aprè 2 entèvansyon chirijikal ak plizyè seyans chimyoterapi. Nan sousi pou manman mwen jwenn pi bon swen sante, prese, prese, mwen rantrel Etazini nan dat 26 septanm 2023. Se la, aprè plizyè randevou medikal, santel ta pral degrade chak jou pi plis. Sa ki te lakòz li te oblije etène lopital pandan 2 fwa, jiskaske li rann souf li nan bra mwen nan dat dimanch 3 fevriye 2024 la, a laj 64 tran sou kabann lakay li. Manmanm rann dènye soupi li, apre mwen te sot pase 2 semèn ap antrene nan lame. Se kòmsi li tap tann mwen rantre poul dim babay. Men Elas ! nan moman lap trepase nan bram, malgre li tande vwam men santel pat pèmèt li dim yon dènye mo anfas. Manmi cheri, jodi a, fanmi, zanmi, nou tout reyini pou nou diw nou renmenw anpil epi rann ou yon dènye omaj kew merite. Ou ale twò vit, lanmòw raple nou kòman lavi kout epi frajil. Manmi ou kite yon gwo vid ki pap janm konble lakay nou ak yon gou anmè kou fyèl nan bouch nou. Pandan tout egzistans ou, ou te toujou la pou nou nan bon kou move tan, ou pat janm dekouraje ak pitit ou yo. Ou travèse avan nou, men pa enkyetew : Mwen ak Ronide pwomèt ou nap kontinye renmen youn lòt epi mete anplikasyon prensip lavi ou te bannou yo. Mèsi, Mèsi, Mèsi anpil pou tout sakrifis ou yo, men elas ! enposib pou nou baw yon lòt souf lavi. Ale, repozew anpè, nou renmenw anpil manmi Loulouse.

Ms. Agnes L. Seide

November 4, 1959 - February 3, 2024